Guillaume Smit vertel ons meer oor die onlangse Spiritualiteit Konferensie wat van 26 tot 29 Augustus by die Andrew Murray Sentrum vir Spiritualiteit in Wellington plaasgevind het. Hierdie konferensie, aangebied deur die Andrew Murray Sentrum en VBO, in samewerking met Hugenote Kollege se Teologiese Skool en die Noordwes-Universiteit se Maatskaplike Werk Skool, het gefokus op die verskillende belewenisse en uitings van spiritualiteit, met ‘n duidelike interdissiplinêre benadering.

Guillaume het die konferensie beskryf as ‘n ryk platform waar akademici, maatskaplike werkers, en geestelike leiers saamgekom het om die vele fasette van spiritualiteit te verken. Die doel van die konferensie was om op ‘n nuwe en kreatiewe manier oor spiritualiteit en die praktiese toepassing daarvan te besin.

Een van die maatskaplike werkers wat die konferensie bygewoon het, het dit as volg beskryf: “Hierdie konferensie is ‘n plek waar ons veilig kan voel om nuuskierig te wees oor God, en waar ons vrae mag vra sonder om te voel dat ons veroordeel sal word.”

‘n Evangeliese diepte en deernis

Een van die hoofkenmerke van die konferensie wat vir Guillaume uitgestaan het, was die evangeliese diepte wat na vore gekom het. Dit het egter nie gegaan oor ‘n spesifieke kerkgenootskap of beweging nie, maar eerder oor die kernwaarhede van die Bybel en hoe dit op ‘n deernisvolle wyse binne die konteks van spiritualiteit toegepas kan word.

“Wat vir my opval, is hoe die sprekers die onderwerp met deernis en persoonlike belewenisse benader het,” het Guillaume verduidelik. Hy het verder gesê dat die manier waarop maatskaplike werkers ‘n brug geslaan het tussen hul veld en die teologie, sonder om die teologie “oor te neem”, vir hom baie indrukwekkend was.

Die interaksie tussen die verskillende dissiplines het uiteindelik ‘n pragtige sinergie geskep, iets wat Guillaume as ‘n besondere aspek van die konferensie beskou het.

Verrassende stories en ‘n dieper deurnis

Wat Guillaume ook verras het, was die diepte van deernis wat tydens die konferensie na vore gekom het. “Dit gaan dieper as net deernis,” het hy opgemerk. Die wyse waarop hoofsprekers hul lewensverhale met die gehoor gedeel het, het ‘n besondere krag gehad. Volgens hom was dit hierdie storielyne wat die deelnemers die meeste geraak het.

“Die akademiese inhoud het ons beslis uitgedaag, en die werkswinkels was prakties en insiggewend, maar dit was die stories van persoonlike ervarings en die verkenning van evangeliese waarhede oor spiritualiteit en menslike verhoudings wat vir my die hoogtepunt was,” het hy gesê.

Van die teoloë wat die konferensie bygewoon het, het genoem dat dit vir hul ‘n verrassende “lekkerte” was om ook te beleef dat mense uit ander disiplines (buite die tipiese teologiese geselskap) ook op besondere wyses oor God, spiritualiteit en geloof praat.

‘n Nuwe manier om na spiritualiteit te kyk

Guillaume is van mening dat die konferensie ‘n belangrike bydrae gelewer het tot die manier waarop mense oor spiritualiteit dink. Dit het ‘n brug geslaan na ‘n interdissiplinêre benadering wat nie net oor die logiese aspekte van teologie gaan nie, maar ook oor die praktiese toepassing daarvan in die alledaagse lewe en in mense se verhoudings met God en mekaar.

Hy het ook beklemtoon hoe belangrik dit is om na verskillende stemme te luister, selfs al stem mense nie noodwendig saam met mekaar nie.

Konferensie se Struktuur en Hoogtepunte

Die konferensie het ‘n verskeidenheid werkswinkels en referate ingesluit wat oor vier dae versprei was. Die gassprekers het onderwerpe soos bewussyn, genesing, kreatiwiteit, en kontemplatiewe musiek aangespreek. Sprekers en aanbieders soos Frieda van den Heever, Johan Beukes en Johan Heystek, het deur middel van werkswinkels en referate temas soos Mandalas en bewussyn, kontemplatiewe musiek, en kreatiewe meditasie met keramiek-klei verken. Elna Mouton het ‘n aangrypende aanbieding gedoen oor konneksies – met God en met mekaar.

Elke dag is gestruktureer rondom spesifieke temas of “paaie” soos die Bewussynspad, die Integrasiepad, en die Verbindingpad, wat bydra tot ‘n holistiese benadering tot kontemporêre Christelike spiritualiteit.

Hierdie konferensie het duidelik ‘n ruimte geskep vir diep nadenke, persoonlike groei, en die bevordering van ‘n ryker begrip van spiritualiteit, wat hopelik voortaan in verdere interdissiplinêre besprekings en geleenthede sal floreer.