Sommige krisisse speel af voor die wêreld se oë; ander verdwyn byna ongemerk uit die internasionale bewussyn. Soedan is so ’n plek waar geweldige lyding voortduur, terwyl die wêreld se aandag dikwels elders gerig is.

As gelowiges word ons geroep om nie weg te kyk nie. Gebed is meer as ’n reaksie op nood; dit is ’n daad van verbondenheid waardeur ons saam met broers en susters in Christus staan, ook wanneer hulle lyding maklik vergeet word.

Soos ons die afgelope weke vir Iran en Libanon ingetree het, word ons nou geroep om ook Soedan in ons gebede te dra.

Sedert die uitbreek van geweld in 2023 het Soedan in ’n verwoestende konflik verval. Magstryde, politieke onstabiliteit en gewapende botsings het groot dele van die land in chaos gedompel. Miljoene mense is uit hul huise verdryf—sommige na buurlande, ander as binnelandse vlugtelinge, sonder sekerheid oor môre.

Die omvang van die krisis is enorm. Terwyl gesinne dikwels van mekaar geskei word en kinders in ’n werklikheid van geweld en trauma grootword, dreig hongersnood al hoe ernstiger in verskeie streke. Toegang tot kos, skoon water en basiese gesondheidsorg is vir baie mense byna onmoontlik. Hospitale funksioneer skaars, infrastruktuur is vernietig, en humanitêre hulp bereik nie altyd dié wat dit die nodigste het nie.

Te midde van konflik en onsekerheid bly gelowiges getrou aan hul roeping. Plaaslike gemeentes, self kwesbaar, word plekke van toevlug en sorg. Waar daar verlies is, bring hulle troos. Waar wanhoop dreig om oor te neem, getuig hulle van hoop.

Vir baie gelowiges in Soedan kom hierdie getuienis teen ’n hoë prys—geweld, diskriminasie en sosiale uitsluiting. Tog hou hulle vas aan die evangelie en leef hulle as draers van lig te midde van donker omstandighede.

Hier word ons herinner aan ’n diep waarheid: God sien. Hy sien die moeder wat haar kind probeer beskerm. Hy sien die gesin op die vlug. Hy sien die gewonde, die honger en die moedelose. En Hy vergeet nie.

In sy ontferming roep Hy ook sy kerk—regoor die wêreld—om sy hande en voete te wees…

Voorbidding vir Soedan: Bid vir vrede en beskerming

• Vir ’n einde aan geweld en gewapende konflik.

• Vir beskerming van burgerlikes, veral kinders, vroue en weerlose gemeenskappe.

• Vir mense op die vlug—vir veiligheid, skuiling en hoop.

Bid vir voorsiening in nood

• Vir kos en skoon water vir dié wat honger en dors ly.

• Vir toegang tot mediese sorg en noodhulp.

• Dat hulporganisasies veilige toegang sal hê tot diegene in nood.

Bid vir genesing en herstel

• Vir gemeenskappe wat uitmekaar geskeur is—dat herstel en versoening moontlik sal word.

• Vir hoop op ’n nuwe toekoms, selfs te midde van verwoesting.

Bid vir die kerk en haar getuienis

• Dat gelowiges standvastig sal bly in geloof, hoop en liefde.

• Vir moed en beskerming vir Christene wat onder druk leef.

• Dat die kerk ’n sigbare teken van Christus se lig en genade sal wees.